This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ക്രോട്ടോ, വാള്‍ട്ടര്‍ ഹരോള്‍ഡ്
സര്‍വ്വവിജ്ഞാനകോശം സംരംഭത്തില്‍ നിന്ന്
ക്രോട്ടോ, വാള്‍ട്ടര്‍ ഹരോള്‍ഡ്
Kroto, Walter Harold (1939 - )
നോബല്‍ പുരസ്കാരജേതാവായ (1996) ബ്രിട്ടീഷ് രസതന്ത്രജ്ഞന്‍. 1939-ല്‍ ഇംഗ്ലണ്ടിലെ കേംബ്രിജ്ഷയറില്‍ ജനിച്ചു. ക്രോട്ടോ സ്കൂള്‍ വിദ്യാഭ്യാസത്തിനുശേഷം, രസതന്ത്ര പഠനത്തിനായി ഷെഫീല്‍ഡ് സര്‍വകലാശാലയില്‍ ചേര്‍ന്നു. 1961-ല്‍ ബിരുദവും 1964-ല്‍ പിഎച്ച്.ഡി ബിരുദവും നേടി. കാനഡയിലെ നാഷണല്‍ റിസര്‍ച്ച് കൗണ്‍സിലില്‍ നിന്നും പോസ്റ്റ് ഡോക്ടറല്‍ ഗവേഷണബിരുദം നേടിയ ശേഷം 1967-ല്‍ ഇംഗ്ലണ്ടിലെ സസെക്സ് സര്‍വകലാശാലയില്‍ അധ്യാപകനായി ജോലിയില്‍ പ്രവേശിച്ചു. ഈ അവസരത്തില്‍ നക്ഷത്രങ്ങളും വാതക മേഘങ്ങളും ഉള്‍പ്പെടുന്ന അന്തരീക്ഷത്തിലെ ലോങ്ചെയ്ന്‍ കാര്‍ബണ്‍ തന്മാത്രകളെ ക്കുറിച്ച് ക്രോട്ടോ ഗവേഷണം ആരംഭിച്ചു. ഇവ എങ്ങനെ ഉണ്ടാകുന്നു എന്നറിയുന്നതിനായി, റിച്ചാര്‍ഡ് സ്മാളി എന്ന ശാസ്ത്രജ്ഞന്‍ വികസിപ്പിച്ചെടുത്ത, ഉപകരണമാണ് ക്രോട്ടോ ഉപയോഗിച്ചത്. നിരന്തര പരീക്ഷണങ്ങള്‍ക്കൊടുവില്‍ 1985-ല്‍ ഹീലിയം അന്തരീക്ഷത്തില്‍ ഗ്രാഫൈറ്റിനെ ബാഷ്പീകരിച്ച് കാര്‍ബണ്‍ ആറ്റങ്ങളുടെ മേഘം (Cloud of Carbon atoms) സൃഷ്ടിക്കാന്‍ ക്രോട്ടോയ്ക്കും സംഘത്തിനും സാധിച്ചു. ഈ കാര്‍ബണ്‍ മേഘങ്ങളെ സ്പെക്ട്രോസ്കോപ്പിക പഠനങ്ങള്‍ക്ക് വിധേയമാക്കിയതില്‍നിന്നും, 40-ഓ അതിനു മുകളിലോ എണ്ണമുള്ള ഇരട്ടസംഖ്യയുള്ള കാര്‍ബണ്‍ തന്മാത്രകളെ കണ്ടെത്താനായി. ഇവയില്‍ കൂടുതലും 60 ആറ്റങ്ങളുള്ളവ ആയിരുന്നു. ഉള്‍ഭാഗം പൊള്ളയായ പന്തിന്റെ ആകൃതിയിലുള്ള ഈ തന്മാത്രകള്‍ക്ക് പഞ്ചഭുജത്തിലും ഷഡ്ഭുജത്തിലുമുള്ള 32 മുഖങ്ങള്‍ (faces) ഉള്ളതായും കണ്ടെത്തി. അമേരിക്കന്‍ ആര്‍ക്കിടെക്ടായ ബുക്ക്മിന്‍സ്റ്റെന്‍ ഫുള്ളറിന്റെ നിര്‍മിതിയോട് സാദൃശ്യമുള്ളതിനാല്‍ ഈ തന്മാത്രയെ ഫുള്ളൈറിന്‍ എന്നു നാമകരണം ചെയ്തു. ബക്കിബാള്‍ എന്ന പേരിലും അറിയപ്പെടുന്ന ഈ തന്മാത്രയുടെ കണ്ടുപിടിത്തം പുതിയൊരു രസതന്ത്ര ശാഖയ്ക്കു തന്നെ ജന്മം നല്‍കി. ഫുള്ളെറിന്‍ തന്മാത്രയുടെ കണ്ടുപിടിത്തത്തിന് ക്രോട്ടോയ്ക്കൊപ്പം, റോബര്‍ട്ട് കേള്‍, റിച്ചാര്‍ഡ് സ്മാളി എന്നിവരും നോബല്‍ പുരസ്കാരത്തിന് അര്‍ഹരായി.
2002-04 കാലയളവില്‍ റോയല്‍ സൊസൈറ്റി ഒഫ് കെമിസ്ട്രിയുടെ പ്രസിഡന്റായും സേവനമനുഷ്ഠിച്ച ഇദ്ദേഹം ഇപ്പോള്‍ ഫ്ളോറിഡ സ്റ്റേറ്റ് യൂണിവേഴ്സിറ്റിയില്‍ നാനോസയന്‍സ് മേഖലയില്‍ ഗവേഷണം നടത്തിയിരുന്നു.
കേരള സര്‍ക്കാരിന്റെ പ്രത്യേക ക്ഷണപ്രകാരം, 2011 ജനുവരിയില്‍ ഇദ്ദേഹം മഹാത്മാഗാന്ധി സര്‍വകലാശാലയില്‍ പ്രഭാ ഷണം നടത്തിയിട്ടുണ്ട്.
